Samba i Rumba

99

„Oly, dođi bržo u moja šoba!“ „Da?“ „Vidis ke žajeb?“ „Ne.“ „Počela mi je Karika, a televizion mi ne dela, porka malora! Samo sam digla kušin za glavu i nestala je šlika. A remengo i oni i njihov digitalni!“ Da vam objasnim: od kad smo nabavili digitalni prijemnik, pola tega

više ne vidimo. Marijuča ima u svojoj kamari neki stari, ali dobri TV kega gleda z kućnon antenom. Kupila si je i ona digitalac da more gledati ča voli i da njoj ne smetamo. Ok, ali čim se samo malo pomakne u

postelji, nestane njoj slika i ona popizdi, pak me zove da joj namjestin. Uf, ja onda čačkan i pročačkan po anteni dokle se slika opet ne pojavi. Živčana je da su je prevarili jer je prije, na stari način, puno bolje vidila

programe. Na meniju digitalca piše da se more gledati i lokalne TV i program Ri. Jok! Mi smo specijalci pak vidimo samo HRT, RTL i Nova TV. Časna riječ, plaćamo pretplatu, a ne gledamo skoro niš. Program

nije po našem guštu. A baj d vej, nije samo problem ča njoj se izgubi slika, nego ne more zapamtiti ča da pritisne na noven daljinskem! Ale Oly, glumi učitelja iz tehnike! Ja je kapin, nije lako u nekin litima zajno skužiti koji je pravi botun za teletekst, pa koji za tornati opet na sliku, onda, ča ugasiti a ča upaliti na drugen daljinsken za se prehititi na satelitski jer i tamo su druge komande. Ma, nije ženi penzički lako. Nike stvari i

meni su nebuloza pak mi dica ,moji monstrumići, pomoru. Pogotovo ča se tiče novega mobića, USB, DVD, vrag i bog. Okay, gren dalje. Dragi i lipi fanovi Teklića, u ove teške recesijske dane nisan još zgubila

busolu i eko me tu da van se požalim. Ne bin politiku u mojoj kužini, ali ča ja moren kad mi ona svira i dirigira! Pasala su vrimena kad se pensalo „ča će meni politika“. Moraš itekako se zanimati jer ako ne,

moreš ujutro doživiti svašta. Nisi informiran, a vlada kambjala zakon, priko noći. Slikaj se. Šoldi je sve manje i sad nan je postala moda da navečer svi skupa sidimo okolo stola i programiramo ča ćemo za ručak

i večeru. He he, mora se ostati u gabaritima takujina. Već sam pasani put napisala da neću ništa od garderobe novega kupovati. I znate ča, ja sam kroz svo to vrime mantrala i bajala, pak sam došla do zaključka: Ča će meni nova boršeta? A nove sandale? Nove brageše? Nova kotula i kostim? Zahvaljujući politiki, bit ću si lipa i poželjna anke u staroj, lanjskoj robi. He, he, he! Fala političarima ča su me prosvijetlili i oslobodili teške bolesti konzumerizma! Samo neka ne kenjaju posle da nam je kupovna moć pala, a tako i za pad u trgovini i u proračunu, pliz! Keko mi se žalija: „Oly moja, ižgleda da će nam smanjiti plaću.“ „I meni, restrikcija i bolni rezovi. Čula sam premijerku. Samo kad će reći da će bolne rezove delati i na sebi? Sve bin hi poslala u emisiju Reži me Svekrva Marijuči pizdi: „Oly, ke žajeb! Neće mi tornati povrat del porez, del dopunsko ošiguranje. Lopovi jedni!“ „Njanke meni.“ Voli ona ćapati nazad svojih 200 kuna, a ki ne voli? Samo nam uzimaju, a ne daju niš. Stvarno škifo. Dojde mi za postati vegetarijanka. Od kad sam čula da uvozimo staro zmrznuto meso za kobasice i salame iz nekih dalekih država, joh je meni. Od kad je pisalo u đornalu da se prodaju kokoše iz Brazila, čim stavin na pjat kus piletine, Keko me zajno pita: „Oly, sta je ova koka plesala samba ili rumba?“ „Samba! Rumba se pleše na Kubi.“ Zbog sve te štorije, češće kuhan verduru. Umisto bišteke, serviran pohane fete šelena. Komentari budu: „Samba ili rumba, mi bi rađe šnicle!“

Mislim da je došlo vrime za kuhanje. Gremo.

LIPA I DOBRA LEĆA

Skuhajte 15 dag leće koja hita na narančastu boju. U pinjati stavite 2 litre vode, jedan lipi kus korijena od šelena, malo vegetice, po kapule i sve to kuhajte po ure. Meni u ekspres loncu triba 20 minuti. Kad je

skuhana, sve procijedite. U mikser dodajte malo maslinovega ulja, ako treba još soli i papra. Zmiksajte u pire. To vam more biti kako prilog uz samba ili rumba, a dobra je i za razne truke u kužini. Naprimjer: ritka

van je maneštra? Šugo? Nima beda, dodajte žlicu-dvi tega pirea i sve će doći na svoje misto. Ukus neutralan, mmm fi ni i delikatni. Provajte svakako, leća je zdrava.

VAŠA OLY

oly.olympia@hi.t-com.hr

Komentari