Belece moje, aj otkad se nismo vidili, boga ti, od lani. Zaželila sam se ja vas i zato eko me da vam se javin. Novo lito, nove stvari, ne? Sigurno ste čuli za oni stari talijanski običaj (to mi je pričala moja svekrva, the famous – Marijuči) da zadnju noć pred novo lito, sve starudije i stari štrafanići se obavezno hitaju kroz prozor, drito na ulicu. To bi stilo reći dosta sa starim problemima, da će u noven litu sve biti novo i lipo. Pensajte, perfin i stare zahodske školjke se frknu van. Ja san joj rekla da laže i izmišlja. „Ši, ši, cara mia, pitaj koga oćeš tamo.“ „Ma tu bi nas policioti zajno posjetili i prijavili za remećenje javnog reda i mira.“ „Da, to bi bio žajeb, ma tu nije Italia.“
Aha. Mislin, došla su neka druga vrimena ki će vraga hitati stvari kroz okno ali… sve je moguće. Običaji su običaji. Ma i Talijani su sada u teškoj krizi i sigurno šparaju pa su za ovo lito, forši, za tradiciju, hitili priko prozora koje stare bičve ili gaće. Nama će ful biti novo kad uletimo u veliku fameju EU. Jušto me zanima kako ćemo dihtati, a sve me je strah jer i tamo ima sirotinje koliko ćeš, još im mi falimo. Intanto, kod mene već ima novosti, altroke! Ne znam da li vas intereša, ma ću van povidati svejeno. Moj Keko ima novi hobi, poludija je za kalamarima, sipama, a ni koja orada mu ne dela škifo. Nagovorili su ga neki likovi z dela i eko ti njega, svaki dan, predvečer se pokupi u ribolov. Nabavija si je dozvolu za amatersko pecanje, tunje, udice, ali ča je najvažnije za večernje ribarenje? Lampadina, al’ ne bilo kakova. Likovi su ga naputili di se to prodaje i partija je drito u Čajna šop. Kad je doša s tim svitlon na čelu, ahahaaa, kako rudar, ma nezaboravna scena! Ja nisam imala blage veze o tim stvarima, ali sad znam ča je to ješka, pušća, voliga i rozeta. Teorija je tu, ali pratika, nula. Nikad nisam pecala, ali on je, kad je bija mali. Sad mu se tornala ljubav za tim. Meni je drago jer mi je komad sritan kako malo dite. Kad sve zbrojin, bolje da se klati po molu i hita udicu u more nego da gnjili pred televizijon. Ne moren reći da ulovi svaki dan, ma ke! Svaki drugi, treći dan donese po jenu ili maksimum dvi sipe. Ili po jenega kalamarića i to je to. Ja svaki komad stavin u frizer i kad se nakupi njih pet, prontan klopu za cilu fameju. Brodetić s palentom, pofrigan ili na lešo s kumpirima. Svi budemo srićni oko stola, plješćemo i vičemo: „Živio Keko! Živio tata, morski vuk!“. Počeja me nagovarati da mu se pridružin. Forši ću. Povida mi je da svaku večer dojde jedna ženska s mužem, invalidom u kolicima. Dopeljaju se z autom, smjeste se na mul, izvade pribor i dage! Znate ča? Ona svaki put ulovi, a muž tu i tamo. Govori mu: „Ale, ale, trudi se! Već sam štufa sama hraniti familiju.“. Lajk za šinjoru i živile žene!
BRODET FOR DUMMIES
To znači za one koji nimaju blage o brodetu. Ričeta je brza i efikasna, bez kompliciranja i pametovanja. Nema ni meda ni kurkume, he, he.
Za 2 peršone, jena sipa ili jedan manji karamal. Ako imaš, može i više. Narizati na fine rezance. U padelu staviti na dno maslinovog ulja, narizati kapulicu, češnjak i prešemul na tanko i laganini neka se dela 10 min. Dodati sipicu ili karamal i još 5 min neka se dinsta. Kad „meso“ omekša, dodaj pelate ili pasatu od pomidori, ubaci list lovora i ružmarina, da sve ćapa miris. Posoli, popapri, dodaj mižolić bilega vina, kuhaj još 2 min i gotovo. Skuhaj palentu i sve na pjat. Valjda znaš servirati. Ja još hitin preko svega parmezan jer ga obožavan i uživan. Vidimo se!
VAS VOLI, VAŠA OLY
oly.olympia@mail.inet.hr
